„Fáðu þér erlent lán gamli minn ef þú höndlar smásveiflur"

Vísir hafði samband við Egil „Gillzenegger" Einarsson til að kanna hvernig hann hyggst takast á við erlendu lánin sem hvíla á bílunum hans, hljómsveitina Mercedes Club og fyrirtækið hans Fjarþjálfun.is sem er að slá í gegn á Íslandi.

„Fáðu þér erlent lán gamli minn ef þú höndlar smásveiflur, sagði bílasalinn við mig," útskýrir Gillzenegger aðspurður um erlendu bílalánin sem hvíla á bílunum hans.

„Smásveiflan varð aðeins meiri sveifla en það meikaði sens þá. Bílasalanum líður ekki vel. Hann sefur ekki vel núna," bætir Gillzenegger við.

Hvernig tekst þú á við efnahagsástandið? „Með bullandi jákvæðni. Ég hef aldrei verið að æsa mig eitthvað yfir þessu ástandi."

„Ég á félaga sem eru fasteignasalar og bankamenn sem voru eins og kvikmyndastjörnur fyrir ári og ég hef tekið mark á þeim í gegnum tíðina."

„Í staðinn fyrir að láta ástandið draga mig niður í þunglyndi þá trúi ég að þetta reddast," svarar Gillzenegger.

Hvað með hljómsveitina Mercedes club er hún hætt? „Við ákváðum að gefa fólki smá „time out". Fólk gat ekki opnað blöð án þess að sjá skítug andlitin okkar," svarar Gillzenegger.

„Nú er ég aðallega að einbeita mér að fjarþjálfuninni. Þar færðu jólagjöfina í ár sem eru gjafakort. Þá fær fólk fáránlega sexí og mjög smekklegt gjafabréf með mynd af mér þar sem ég er helmassaður og töff."

„Ég byrjaði að prófa mig áfram með fjarþjálfun fyrir tveimur árum. Ég var lengi búinn að hugsa hvernig ég gæti gefið fólki aðhald án þess að taka handlegginn af því," segir Gillzenegger.

En hittir þú persónulega viðskiptavinina? „Já við hittumst og ég rölti með hverjum og einum í gegnum salinn og ég kenni þeim og sýni fólki hvað það á að gera með réttri tækni og leiðrétti það þegar það byrjar. Síðan fær hver og einn nákvæmt prógram sem er byggt á líkamsræktarforriti í gegnum tölvupóst."

„Ég er í stöðugu internetsambandi við fólk sem sendir mér matardagbók og ég drulla yfir hana ef hún er ekki í lagi og laga hana. Eftir fjórar vikur kemur fólk aftur og ég mæli það því ummál er áræðanlegra en vigtin. Þá sé ég hvað það er að gera. Þá athuga ég hvort það er að fara niður í ummáli og ef svo er þá er fólk á góðri leið."

„Ég hitti alla í Sporthúsinu og sýni æfingarnar sem fólk gerir svo í líkamsræktarstöðinni sinni eða heima í bílskúr. Ég er með fólk á hverri einustu líkamsræktarstöð á landinu."

„Þú getur verið hvar sem er. Bara þar sem þér líður vel. Það góða við fjarþjálfunina er að fólk þarf ekki að hugsa og nær góðum árangri. Ég er búinn að finna formúluna," segir Gillzenegger sem útskrifast sem íþróttafræðingur á næsta ári frá Háskóla Reykjavíkur.

Skoða fjarthjalfun.is.