Emanuel fer með Obama í Hvíta Húsið

Barack Obama, verðandi Bandaríkjaforseti, er þegar byrjaður að velja í stjórn og starfslið sitt. Í fréttum í dag kom fram að hann hefði boðið Rahm Emanuel, fulltrúadeildarþingmanni og fyrrverandi ráðgjafa Bills Clintons, að verða starfsmannastjóri sinn. Það kom síðan í ljós nú í kvöld að Emanuel hefur þegið boðið og mun því fylgja Obama í Hvíta Húsið.

Barack Obama og Joe Biden varaforseti hans halda blaðamannafund á morgun.

Emanuel, sem er fjörutíu og átta ára, er þungavigtarmaður í Demókrataflokknum þótt hann hafi aðeins setið í fulltrúadeildinni fyrir Illinois-ríki síðan 2002. Hann hélt um fjáröflun fyrir forsetaframboð Clintons 1992 og varð síðan einn helsti ráðgjafi hans í efnahagsmálum á árunum 1993 til 1998. Emanuel átti stóran þátt í afla nægilegs stuðnings úr röðum demókrata við sjö hundruð milljarða dala bankabjörguninni fyrir skömmu.

Staða starfsmannastjóra í Hvíta húsinu er talin ein valdamesta staða í bandarískum stjórnmálum.