Obama gengur vel að safna í kosningasjóðinn

Frambjóðandi Demókrataflokksins til bandarísku forsetakosninganna, Barack Obama, safnaði alls 52 milljónum dala, sem jafngildir um fjórum milljörðum íslenskra króna, í kosningasjóð sinn í júní. Það er vel rúmlega tvöfalt meira en forsetaframbjóðandi Repúblikanaflokksins, John McCain, safnaði í sinn sjóð en McCain krækti sér „aðeins" í 22 milljónir dala en hefur þó aldrei safnað eins miklum pening í einum mánuði.

David Plouffe, kosningastjóri Obama, var að vonum ánægður með árangurinn en meðalstyrkur hvers og eins í kosningasjóðinn var eingöngu 68 dalir samkvæmt Plouffe. Það þýðir að yfir 750 þúsund manns hafi veitt fé í kosningasjóð Obama.

Þrátt fyrir þetta er talið að Repúblikanaflokkurinn eigi töluvert digurri bankasjóði en Demókrataflokkurinn til þess að nota í forsetakosningarnar.