Ég er að vanda mig

Ólafur F Magnússon borgarstjóri segist hafa þekkt Jakob Frímann Magnússon nýráðinn framkvæmdarstjóra Miðborgar lengi en ráðningin sé ekki til komin vegna þess. Hann telur Jakob rétta manninn í starfið og boðar niðurskurð í borgarkerfinu, sérstaklega hjá stjórnmálamönnum.

Ólafur var gestur í Íslandi í dag fyrir stundu þar sem umdeild ráðning Jakobs var rædd. Ólafur lagði á það áherslu að ekki þyrfti að auglýsa tímabundin störf innan borgarinnar en ráðning Jakobs er til 12 mánaða og rúmast innan þess ramma. Hann segir stöðuna verða auglýsta verði hún enn til að ári liðnu.

Aðspurður hvort hann skildi að fólki sviði ráðningin sagði Ólafur að ekki væri verið að snuða einn eða neinn hugsanlegan umsækjanda.

„Það er verið að ráða þennan mann í þetta átak en ekki verið að þenja út stjórnkerfið. Ég ætla að skera niður og sérstaklega hjá stjórnmálamönnum. Ég er að vanda mig og vísa aðdróttunum um að ég sé að stuðla að ofurlaunum há borginni á bug. Ég hefa alla tíð verið mjög aðahaldssamur."

Ólafur sagðist t.a.m sjálfur aldrei hafa farið í ferðir erlendis á vegum borgarinnar en honum hafi oft verið boðið í slíkar ferðir. Hann ætlar að láta skoða utanlandsferðir borgarfulltrúa á árunum 2005-2008.