Óli er ekki að grínast, segir Sigfús

Vísir hafði samband við Sigfús Sigurðsson leikmann íslenska handboltalandsliðsins og spurði hann um jákvæðan orðaforða fyrirliðans Ólafs Stefánssonar.

Ólafur hefur gripið til þess að segja ekkert neikvætt í viðtölum eða í samtölum við liðsfélaga.

Í stað þess að segja eitthvað neikvætt hefur Ólafur gripið til þess ráðs að segja: *bíb*.

Þetta sást glöggt í viðtali eftir leikinn við Pólland.

Þá sagði Ólafur meðal annars: „Við vorum að klifra þetta fjall og það voru tvær leiðir í dag. Önnur var *bíb* og hin var upp...Það voru allir í fílingnum, ekkert að hugsa um hvort við myndum vinna eða *bíb* skiluru.

"Þetta er meira eitthvað sem við höfum reynt að tileinka okkur í undirbúningnum og Óli er bara að sýna það í tali og verki eins og við hinir. Hann fer bara skrefinu lengra á sinn hátt," svarar Sigfús Sigurðsson þegar hann er spurður út í málið.

Þetta er þá ekkert grín hjá fyrirliðanum? „Nei. Við reynum og erum að nýta okkur það sem getur hjálpað. Og þá meina ég allt."