Sakar Obama um að nota sér kynþátt sinn

Kosningaherferð John McCain, frambjóðanda Repúblikana sakar Barack Obama, frambjóðanda Demókrata um að nýta sér kynþátt sinn í kosningabaráttunni.

Kemur ásökunin í kjölfar ummæla Obama í gær um að Repúblikanar myndu reyna að hræða kjósendur frá því að kjósa Obama með því að segja „Hann lítur ekki út eins og hinir forsetarnari á dollara-seðlunum."

Obama er fyrsti svarti maðurinn sem hefur möguleika á að verða forseti Bandaríkjanna. McCain hefur ekkert talað um kynþátt Obama hingað til í kosningabaráttunni en hann hefur aftur á móti sagt að Obama skorti reynslu. Obama er mun yngri en flestir forsetarnir á dollara-seðlunum auk þess sem hann er ekki heldur hvítur eins og þeir eru allir.

Obama sagði einnig í gær að McCain og Bush myndu hræða kjósendur með því að benda á að hann hafi skrýtið nafn og að hann sé ekki nógu þjóðrækinn.

Rick Davis kosningastjóri McCain telur þessi ummæli Obama vera neikvæð, skammarleg og röng samkvæmt fréttavef Breitbart.com