Þorskverð í hæstu hæðum

Þorskverð á fiskmörkuðum hérlendis síðustu daga hefur aldrei verið hærra og hefur óslægður þorskur verið að seljast á yfir 350 krónur kílóið. Stórhækkaður lána- og olíukostnaður skyggir hins vegar á gleði útgerðarmanna.

Smábátarnir streymdu inn til Grindavíkur í dag með afla sem umbreytist í geysiverðmætan gjaldeyri sem íslenskt efnahagslíf hrópar á. Verðið fyrir óslægaðan þorsk hefur aldrei verið hærra, samkvæmt upplýsingum frá Fiskmarkaði Íslands, og meðalverð síðustu daga verið frá 320 og upp í 370 krónur krónur fyrir kílóið. Aðrar fisktegundir hafa einnig verið að gefa vel af sér. Verðið í erlendri mynt hefur reyndar sigið en gengislækkun krónu gerir meira en að vega það upp.

Bátarnir voru að landa um og yfir tveimur tonnum hver og aflaverðmætið 400 til 500 þúsund krónur, sem telst bærilegt fyrir tvo menn eftir daginn. Sjómennirnir í Grindavík voru þó ekkert að hoppa hæð sína í loft upp. Skipverjarnir á netabátnum Mörtu Ágústsdóttur GK voru að undirbúa brottför. Útgerðarmaðurinn var hreint ekki kátur. Erlendu lánin væru að fara með allt til anskotans. Þetta væru bara hamfarir. Útgerðarmönnum finnst krónan vera orðin allt of veik. Magnús Kristinsson, útgerðarmaður í Vestmannaeyjum, segir að menn hafi fjárfest í veiðiheimildum og skipum og tekið erlend lán og nú væru lánin komin upp fyrir allt velsæmi. Gengisvísitala krónunnar yrði að nást niður. Hann færir ríkistjórninni það ráð gegn kreppunni að auka nú þegar þorskkvótann.