Grunaði ekki að Freddie væri hommi

FGítarleikari rokksveitarinnar Queen og góðvinur Nylon-flokksins, Brian May, hefur stigið fram með merkilegar upplýsingar. Hann segist nefnilega aldrei hafa grunað að Freddie Mercury væri hommi. Freddie hafi nefnilega átt urmulinn allan af kærustum.

May og Mercury voru ákaflega nánir félagar á upphafsárum hljómsveitarinnar og May hafði ekki hugmynd um að félagi hans og vinur væri fyrir stráka. „Ég meina, ég deildi herbergjum með Freddy á tónleikaferðum og kynntist mörgum af hans kærustum og hann átti svo sannarlega enga kærasta,“ segir May í samtali við Daily Express.

May segir jafnframt að eftir að Mercury áttaði sig á samkynhneigð sinni þá hafi hann farið mjög leynt með hana á opinberum vettvangi. „Hann viðurkenndi aldrei bókstaflega að hann væri samkynhneigður heldur sneri sig út úr spurningum um það efni. Freddie var enginn asni,“ segir May og bætir því við að þeir sem sjái sögu Freddie Mercury eingöngu í ljósi samkynhneigðar séu á villigötum. „Freddie elskaði bara tónlist og hann vildi ekki að neitt gæti stoppað hann í þeirri ástríðu sinni,“ segir May.