Lét klóna hundinn sinn

Vísindamenn í Suður Kóreu segjast hafa klónað gæludýr bandarísks manns sem gat ekki hugsað sér að sjá á bak hundinum sínum.

Þetta mun vera í fyrsta sinn sem þessi þjónusta er veitt, en Bernann McKinney greiddi fimmtíu þúsund dollara, tæpar fjórar milljónir króna fyrir fimm eintök af hundinum sínum Booger, sem er af Pit bull tegund.

Hvolparnir voru afhjúpaðir á blaðamannafundi í Seoul í morgun. McKinney segir að Booger hafi verið besti vinur sinn en vísindamönnunum tókst að klóna hvolpana með því að nota húðfrumur sem teknar voru af Booger áður en hann dó.

Eftir að fóstur höfðu verið ræktuð var þeim komið fyrir í tíkum sem gengu með hvolpana í þrjá mánuði. Þetta er ekki í fyrsta sinn sem hundur er klónaður en aldrei áður hefur það verið gert í þessum göfuga tilgangi. Vísindamennirnir ætla að bjóða þjónustuna áfram og búist er við að verðið lækki með tímanum.