Of feitir mynda þol gagnvart mat

Neysla matar er offitusjúklingum ef til vill ekki sú nautn sem ætla mætti miðað við það magn sem þeir borða.

Fræðingar við Háskólann í Texas draga þessa ályktun af því að þeir telja sig hafa komist að því að fólk yfir kjörþyngd myndi eins konar þol gagnvart mat og þurfi því að borða meira til að ná sömu ánægju út úr máltíðinni og fólk í eðlilegum holdum.

Ef til vill er þetta svipað því þegar þol drykkjumanna eykst eftir því sem ofdrykkja verður meiri hjá þeim. Heili þeirra sem eru of feitir fer með tímanum að framleiða minna magn af miðtaugakerfisboðefninu dópamíni sem um leið gerir það að verkum að þeir þurfa að neyta meiri matar til að fá sömu ánægjutilfinninguna út úr máltíðinni og meðalmanneskjan.

Þessa vitneskju telja vísindamennirnir geta gagnast við að grípa inn í rás atburða hjá þeim sem eru að þyngjast um of með því að fá þá til að breyta samsetningu þeirrar fæðu sem þeir neyta. Væntanlega gleðifréttir á krepputímum.