Til hjálpar vinum

Leikarinn Matthew McConaughey hefur komið tveimur brimbrettavinum sínum í Kaliforníu til hjálpar. Þeir hafa verið sakaðir um að ráðast á hóp papparassa sem reyndu að smella myndum af McConaughey.

Mennirnir eiga yfir höfði sér dóm fyrir athæfi sitt en atvikið átti sér stað á Malibu-ströndinni í júní síðastliðnum. Kapparnir fleygðu einum ljósmyndaranum í sjóinn og annar papparassinn segir þá hafa ráðist á sig og fleygt myndavél sinni í sjóinn.

McConaughey segist skilja hegðun félaga sinna en viðurkennir að honum sé alveg sama þótt papparassarnir myndi hann. „Þetta var samfélagslegt mál og þeim fannst þeir vera að spilla friðnum á svæðinu," sagði hann um félaga sína.

„Þegar ég er á brimbrettinu reyni ég að hugsa ekki um ljósmyndarana. Þeir eru bara að reyna að ná mynd. Ef þeir myndu koma út í vatnið væri þetta allt annað mál."