Litríkur hópur í detoxferð

Ævintýralega skemmtilegur, litríkur og kátur hópur er á leið til Póllands í föruneyti heilsufrömuðarins Jónínu Benediktsdóttur. Þar er um að ræða ferð sem farin verður 3. janúar en margir sjá það sem góðan kost að huga rækilega að heilsunni eftir hátíðar.

Í hópnum munu vera þeir Ásgeir Þór Davíðsson sem betur er þekktur sem Geiri á Goldfinger og góður vinur hans Þorsteinn Hjaltested óðalsbóndi við Vatnsenda. Þeir hafa áður farið í heilsu- og megrunarferðir til Taílands en vilja nú láta á þetta reyna.

Þá er líklegt að Gunnar Þorsteinsson kenndur við Krossinn fari sem og félagar hans. Eftir því sem Fréttablaðið kemst næst verður einnig með í för sjálfur Birgir Enni sem kosinn var ferðamálafrömuður Færeyja í fyrra – og mun hann vera með skemmtilegri mönnum. Hann hefur komið hingað í tengslum við færeyska daga á Fjörukránni undanfarin ár og á fjölda íslenskra vina. Fari hann má allt eins víst telja að Jónína muni færa út kvíarnar og fara að fylgja Færeyingum til Póllands í detox-ferðir sem mjög vel er af látið.

Heyrst hafði að Jóhannes Viðar Fjörugoði væri einnig að fara með. Þegar Fréttablaðið hafði samband við Jóhannes sagðist hann ekki komast eins og til stóð því hann þyrfti að sitja ferðamálaráðstefnu í Helsinki 15. janúar. „En ég fer örugglega með vorinu,“ segir Jóhannes sem hefur farið áður og segir það frábært. „Það er gott að fara reglulega. Eiga möguleika á að afrugla sig ef maður gleymir sér,“ segir Jóhannes. Fjörugoðinn segist ekki geta tíundað lista þátttakenda en er helst á því að sú tilgáta að feitlagnir menn séu öðrum kátari eigi við nokkur rök að styðjast.

Geiri segist í samtali við Fréttablaðið ekki geta tjáð sig um marga aðra en sjálfan sig en rétt sé að hann sé að fara. Búið er að ganga frá pöntun og miða. „En ef Gunnar er að fara þá verður í nægu að snúast hjá honum,“ segir Geiri og hlær. „Því Steini er yfirlýstur heiðingi. Og sjálfsagt vill Gunnar sýna mér villur míns vegar.“

Gunnar segir það líklegt en ekki alveg frágengið hvort hann fari til Póllands. Hann fór í fyrra og ber því vel söguna. „Það er taug sem togar í mig. Ég hef alltaf farið í uppgjör fyrstu vikurnar í janúar og það eru afskaplega góð skilyrði í Póllandi.“ Til stendur að nokkrir félagar Gunnars, þó ekki úr Krossinum, sláist í hópinn en fastan er afskaplega dýrmæt: „Eitt af því sem Guð hefur gefið okkur, eitt sterkasta vopn sem við eigum en Guð segist umbuna þeim sem fasti. Það merkir að snerta menn og blessa með sýnilegum hætti,“ segir Gunnar.

jakob@frettabladid.is