Friður í Kenía ræðst af því hvort tekið verður á spillingu

Friður í Kenía ræðst af því hvort ríkisstjórnin þar er reiðubúin að takast á við spillinguna sem samfélagið er gegnsýrt af. Þetta segir fyrrum yfirmaður sérstakrar spillingarnefndar í Kenía sem flýði land fyrir þremur árum eftir að hafa birt upplýsingar sem sýndu fram á spillingu á æðstu stöðum.

John Githongo sneri aftur heim í gær eftir þriggja ára útlegð sem hann segist hafa verið neyddur í eftir að hafa verið hótað lífláti af ráðherrum í síðustu ríkisstjórn. Hann er kominn heim undir verndarvæng Raila Odinga forsætisráðherra sem myndaði samsteypustjórn með Mwai Kibaki forseta í kjölfar blóðugra óeirða í kjölfar kosninga um síðustu áramót.

Githongo sagði við heimkomuna að þörfin fyrir opna og ábyrga stjórnsýslu hefði aldrei verið meiri, Keníumenn myndu fylgjast vel með ríkisstjórninni sem nú sæti og hún yrði metin af verkum sínum.

Odinga forsætisráðherra sagði að full þörf væri fyrir Githongo heima fyrir og að stjórn sín væri staðráðin í að takast á við fortíðina af fullri alvöru.

Odinga keppti um forsetaembættið við Kibaki á þeirri forsendu að hann myndi útrýma spillingunni í landinu sem kostar ríkissjóðinn í Nairobi milljarða á hverju ári - og hefur gert að verulegu leyti allt síðan Kenía fékk sjálfstæði frá Bretum 1963. Óeirðirnar sem brutust út eftir kosningarnar umdeildu um áramótin beindu kastljósinu að djúpstæðum ágreiningi í landinu um eignarhald yfir landi og gríðarlegu efnahagslegu misrétti.