Ekkill Benasír Bhutto kjörinn forseti Pakistan

Stuðningsmenn pakistanska þjóðarflokksins fögnuðu ákaft á götum höfuðborgarinnar Islamabad í dag, eftir að fréttist af niðurstöðum atkvæðagreiðslna á sambandsþinginu og fjórum héraðsþingum.

Asif Ali Zardari var mjög í skugga eiginkonu sinnar Benasír Bhutto, þar til hún var vegin skömmu fyrir áramót í fyrra. Þá tók hann við flokknum, ásamt syni sínum, þó að af honum hafi löngum farið vafasamt orð.

Hann var þekktur á valdatímum konu sinnar sem herra tíu prósent, maðurinn sem þurfti að borga undir borðið til að ná samningum hjá ríkinu. Á tímum herforingjastjórna þurfti hann að dúsa samtals ellefu ár í fangelsi fyrir spillingu, en var þó aldrei sakfelldur.

Forsetaembættið er tiltölulega valdalítið í Pakistan en Bandaríkjamenn fögnuðu þó kjöri Zardaris, enda hefur hann verið ákafur talsmaður þess að ganga harðar fram gegn talibönum og fylgismönnum þeirra í Pakistan. Eins og til að minna á tilveru sína, sprendu hryðjuverkamenn sprengju í Peshawar með þeim afleiðingum að á fjórða tug manna lét lífið.