Stór-glæpamaður of stór fyrir fangaklefa

Kanadískum fanga var sleppt úr fangelsi áður en hann hafði afplánað dóm sinn þar sem hann var of feitur til að rúmast í fangaklefa.

Fíkniefnasalinn Michel Lapointe vegur á þriðja hundrað kílógrömm og aðstaðan í fangelsinu í Montreal sem hann afplánar í býður hreinlega ekki upp á fangaklefa sem henta slíkum líkamsburðum.

Hvorki stóllinn í klefa Lapointe né rúmið nægja honum og má nefna sem dæmi að Michel, sem hlýðir gælunafninu Stóri-Mike stendur langt út úr rúminu á alla kanta þegar hann reynir af veikum mætti að koma sér fyrir þar. Þetta telja fangelsisyfirvöld ótækt og hafa hreinlega gefist upp á þessum réttnefnda stór-glæpamanni eftir að tvö önnur kanadísk fangelsi, sem leitað var til, tóku ekki í mál að skjóta yfir hann skjólshúsi.

Í ljósi þessa var ekki margt annað í stöðunni en að veita Lapointe frelsi sem vonandi dregur ekki dilk á eftir sér. Sjálfur kveðst hann vilja lifa eðlilegu lífi, vissulega hafi honum orðið fótaskortur á hinum þrönga vegi dygðarinnar en nú hafi hann goldið samfélaginu skuldina og vilji búa sínum stórvaxna líkama önnur heimkynni en allt of þrönga fangaklefa.