Mörður hættir störfum fyrir Samfylkinguna

„Já ég er að hætta þarna og fer í það sem ég kalla sjálfstætt starfandi íslenskufræðingur og stjórnmálamaður," segir Mörður Árnason varaþingmaður og Samfylkingarmaður. Mörður hefur séð um vef Samfylkingarinnar síðasta árið og einnig komið að ýmsum útgáfumálum tengdum flokknum. Hann hverfur nú á braut en viðurkennir að hann sé með svolítinn skjálfta í maganum.

Mörður hefur verið ráðinn til ýmissa verkefna hjá Reykjavíkur Akademíunni en ætlar einnig að prófa í fyrsta skipti á ævinni það sem oft er kallað að „frílansa".

„Það leggst vel í mig en ég hef ekki gert það með þessum hætti áður. Það er því smá skjálfti í maganum en maður verður að prófa þetta líka," segir Mörður og bætir við að verkefnastaðan hjá sér næstu mánuði sé þokkaleg.

Aðspurður um ástæður þess að hann hætti hjá flokknum vísar hann á Skúla Helgason framkvæmdarstjóra flokksins. „Ég held hinsvegar að ánægjan með þessi starfslok sé gagnkvæm."

Skúli Helgason segir að Mörður hafi ekki verið rekinn en hann hafi verið með eins árs samning við flokkin sem renni út 5.október. „Þetta var alltaf tímabundin ráðning og niðurstaðn var sú að hann myndi klára þennan samning og hætta svo, það lá fyrir í sumar."

Skúli segir að Samfylkingin vænti góðs samstarfs við Mörð áfram enda sé hann mikilvægur liðsmaður sem hafi staðið sig vel í ýmsum útgáfumálum og umsjón með vefnum.

Skúli segir að ekki standi til að ráða neinn í stað Marðar. „Það verða gerðar ákveðnar breytingar á skrifstofuhaldinu hjá okkur og áherslan flyst svolítið yfir á aðra þætti, það kemur enginn beinlínis í hans skó en við munum styrkja flokkinn í þeirri baráttu sem er framundan."