Gaddafi yngri og frú handtekin á hóteli í Genf

Hannibal Gaddafi, yngsti sonur Líbýuleiðtogans Muammar Gaddafi, og eiginkona hans, sem er á barmi þess að fæða barn þeirra hjóna, voru handtekin á þriðjudag eftir meintar barsmíðar sem áttu sér stað á lúxussvítu hótels í Genf í Sviss.

Það var þjónustufólk þeirra hjóna sem kvartaði yfir því að hendur hefðu verið lagðar á það og kom til nokkurra átaka milli lögreglu og lífvarða Gaddafis þegar lögregla mætti á staðinn. Lyktir málsins urðu þær að Gaddafi-hjónin voru handtekin ásamt tveimur lífvörðum þeirra og færð til skýrslutöku.

Þeim var þó sleppt síðar um kvöldið en athygli vakti að tryggingin fyrir Hannibal var 15 milljónir króna en spúsan þurfti að punga út 22 og hálfri milljón fyrir að fá að fara frjáls ferða sinna.