Dr. Spock vill líka spons frá símafyrirtæki

Júróvisjónkeppendur spyrða sig nú hver af öðrum við símafyrirtæki. Víðfrægt myndband Merzedes Club fyrir Símann hefur tæpast farið framhjá mannsbarni, og á hádegi í dag verður nýtt myndband Eurobandsins frumsýnt - á vefsíðu símafyrirtækisins Nova.

„Við bíðum spenntir eftir símtali frá sveitasímanum, tja eða Gufunesradíói," segir Óttar Proppé, forsvarsmaður ofurgrúppunnar Dr. Spock, sem hafnaði í þriðja sæti í Laugardagslögunum með sjómannaslagarann „Hvar ertu nú?".

Óttar á greinilega allt eins von á því að Gufunesradíó lýsi yfir áhuga á að kosta gerð myndbands við lagið. Enda viðeigandi, Gufunesradíó var fyrir daga farsíma eina leiðin til að hafa símasamband við fiskiskip.

Hann segir þó engin sérstök áform um myndbandsgerð. Sveitin hafi verið að einbeita sér að því undanfarið að koma fram í eigin persónu, og sé til að mynda nýkomin heim úr hringferð um landið.