Stoppaði oft fréttir frá Símoni

Hvorki Jónas Kristjánsson né Mikael Torfason muna eftir því atviki þegar að tvær fréttir sem Símon Birgisson skrifaði voru slegnar af borði ritstjórnar. Símon skrifaði færslu um málið á bloggsíðu sína í dag sem að Vísir vitnaði í.

Mikael segir þó að eins og Símon stilli málinu upp á bloggsíðu sinni sé það algjör vitleysa. Það sé algengt að á ritstjórnum séu skrifaðar fréttir sem birtist ekki af því að þær eru ekki nógu góðar eða merkilegar. Símon sé enginn undantekning á þeirri reglu. Það heiti að ritstýra en ekki að ritskoða. Þetta mál eigi ekkert skylt við atburðarrásina í DV málinu sem kom upp fyrr í vikunni þegar fyrrverandi blaðamaður á DV birti samræður sínar við Reyni Traustason, ritstjóra blaðsins. Í samtali þeirra kemur fram að Reynir Traustason vildi ekki birta frétt sem blaðamaðurinn hafði skrifað af ótta hans við að ákveðnir aðilar beittu sér fyrir því að útgáfa blaðsins yrði stöðvuð.

„Ég botna hvorki upp né niður í einhverjum glory hunters sem vilja einhvern veginn fá að vera með unga DV manninum," segir Mikael. Hann tekur fram að það sem skipti máli sé ekki það að ákveðið hafi verið að henda fréttinni heldur þær ástæður sem Reynir hafi nefnt og komu fram í samtalinu sem spilað var í Kastljósi.

Mikael segir að það sé stór munur á ritstjórn og ritskoðun. Fréttirnar sem Símon tali um hafi verið algjört smámál um innanhúsmálefni Fréttablaðsins og varla átt heima í slúðurmola.