Innlent

Kirkjumálaráðherra: Biskupinn var einstakur maður

„Með Sigurbirni Einarssyni er genginn öflugur málsvari kristni og mannúðar," segir Björn Bjarnason ráðherra kirkjumála.

„Ég heyrði hann síðast flytja snjalla prédikun fyrir fáeinum vikum, hinn 27. júlí í Reykholtskirkju. Þar fullvissaði hann okkur enn og aftur á sinn einstæða hátt um návist Jesú Krists, hann væri í gær og í dag hinn sami og um aldir. Kristin trú væri auk þess helgasta arfleifð og dýrmætasta eign þjóðarinnar. Hún hefði styrkt ættjarðarást og vakningu um íslenska tungu undir forystu Fjölnismanna. Tungan væri fjöreggið, sem sjálfstætt Ísland ætti líf sitt undir," segir Björn.

Björn segir að til hinstu stundar hafi Sigurbjörn brýnt Íslendinga til að hafa kristin gildi í heiðri, sögu okkar, tungu og sjálfstæði. "Hann var einstakur maður í öllu tilliti, blessuð sé minning hans," segir Björn.

Geir Haarde forsætisráðherra segir að allt til hinstu stundar hafi Sigurbjörn verið einlægur og virkur í þeirri köllun sinni að efla trúarvitund Íslendinga og mikilvægi kristinnar trúar í daglegu lífi. Prédikanir herra Sigurbjörns hafi borið vott um innsæi hans og sálmar hans og bænir snerti streng í hjarta sérhvers kristins manns.

„Við andlát hans er Íslendingum efst í huga þakklæti fyrir það sem hann veitti þjóð sinni. Hans er minnst sem ástsælasta andlega leiðtoga þjóðarinnar á síðari tímum," segir Geir.




Tengdar fréttir

Dr. Sigurbjörn Einarsson er látinn

Dr. Sigurbjörn Einarsson biskup er látinn. Hann lést í morgun, 97 ára að aldri. Sigurbjörn gegndi embætti biskups Íslands frá árinu 1959 til 1981. Núverandi biskup, Karl, er sonur Sigurbjörns. Tilkynning frá Biskupsstofu fer hér á eftir:

Mest lesið


Fleiri fréttir

Sjá meira


×

Mest lesið