Katrín: Ekkert sem toppar þetta

Landsliðsfyrirliðinn Katrín Jónsdóttir á langan feril að baki og segir ekkert toppa það að komast á EM með landsliðinu.

Ísland tryggði sér í kvöld sæti í úrslitakeppni EM sem fer fram í Finnlandi á næsta ári með 3-0 sigri á Írlandi.

„Mér líður æðislega og þetta er alveg yndislegt. Maður er eiginilega bara orðlaus," sagði Katrín í samtali við Vísi. „Það er ekkert sem toppar þetta hjá mér og ekkert sem kemst nálægt þessu."

Hún segir þó ljóst að liðið ætli að setja sér ný markmið fyrir keppnina í Finnlandi. „Nú fáum við tíma til að njóta þess að vera komnar á EM en svo kemur að því að við setjumst niður og setjum ný markmið. Ég veit ekki hvort margir Íslendingar höfðu trú á því að við myndum ná þessu markmiði en við mistum aldrei trúna. Við getum alveg gert enn betur og erum alltaf að bæta okkur. Við erum með góða leikmenn og mikla breidd."

Leikmenn og þjálfari írska landsliðsins voru óánægðir með að leikurinn skyldi fara fram við svo erfiðar aðstæður en Laugardalsvöllurinn var gaddfreðinn í kvöld og stóðu leikmenn varla í lappirnar.

„Maður sá það í upphitun að þær voru skransandi á vellinum og greinilega pirraðar. Svo heyrði ég í hálfleik að þjálfari þeirra hafði farið mikinn og beðið dómarann um að blása leikinn af."

„Við vorum hins vegar ákveðnar í því að láta engan bilbug á okkur finna. Aðstæður voru eins fyrir bæði lið en þetta var bara ekkert að trufla okkur. Við vissum að þessu yrði ekki breytt. En þetta truflaði þær greinilega. Ég vil meina að við séum með betra lið en Írar en þær áttu ekki góðan dag."

„Auðvitað hefði verið betra að spila innanhúss en það stóð bara ekki til boða. Ég veit þar að auki ekki hvort að völlurinn hefði verið eitthvað betri eftir tvo daga. En það bara skiptir ekki máli - við erum komnar áfram."