Danir blekktir af Útlendingaeftirliti sínu

Komið er í ljós að Útlendingaeftirlitið í Danmörku hefur blekkt þegna landsins árum saman. Þingmenn krefjast nú opinberrar rannsóknar á málinu.

Málið snýst um svokallaða 24 ára reglu þegar Dani giftist erlendum ríkisborgara og ætlar að flytja með henni, eða honum til Danmerkur. Samkæmt reglum verður viðkomandi maki að hafa náð 24 ára aldri svo þetta sé hægt.

Því hefur fjöldi Dana fluttst til Svíþjóðar eða Þýskalands með mökum sínum og búið þar, oft árum saman, þar til 24 ára aldrinum er náð og þau þá getað flutt aftur til Danmerkur.

Í ljós hefur komið að samkvæmt reglum Útlendingaeftirlitsins þarf parið aðeins að fá sér sumarstarf innan Evrópusambandsins í tvær til tíu vikur og getur eftir það hafið löglega sambúð í Danmörku þótt makinn hafi ekki náð 24 ára aldrinum.

Þetta hafa starfsmenn eftirlitsins vitað árum saman en aldrei gert viðkomandi grein fyrir þessum möguleika. Þingmenn á danska þinginu fara fram á opinbera rannsókn á málinu og ráðherra innflytjendamála í Danmerkur segir að hún ætli að skerpa á starfsreglum Útlendingaeftirlitsins.