Norður-Kóreumenn segjast ræsa kjarnaofn

Enn dregur til tíðinda í kjarnorkumálum Norður-Kóreumanna sem hafa nú boðað að þeir muni ræsa kjarnaofn í einu kjarnorkuvera sinna.

Hyun Hak-Bong, sem setið hefur við samningaborð hinna sex ríkja, sagði á fundi nýlega að það kæmi fljótlega í ljós hvenær einn ofnanna í Yongbyon-kjarnorkuverinu í Norður-Kóreu yrði ræstur. Sexríkjaviðræðurnar, sem meðal annars Bandaríkin, Japan og Kína taka þátt í, miða að því að ná samningum sem allir geti sæst á um kjarnorkunotkun Norður-Kóreumanna.

Í júní lögðu þeir fram 60 blaðsíðna skýrslu um plútóníumframleiðslu sína allar götur síðan 1986 og segjast þeir þar eiga nægilegt plútóníum í sjö kjarnorkusprengjur. Ekki hugnast öllum hlutaðeigandi þetta, sérstaklega í ljósi þess að Norður-Kóreumenn höfðu sagst ætla að hætta allri framleiðslu í síðasta lagi um miðjan ágúst. Talsmaður bandaríska varnarmálaráðuneytisins segir það vera stórt skref afturábak, gangi Norður-Kóreumenn á bak þessara orða sinna.