Ronaldo að hitta gifta konu

Knattspyrnugoðið og kvennabósinn Cristiano Ronaldo er að hitta gifta konu. Þessu heldur breska götublaðið News of the world fram í dag. Alyona Haynes heitir stúlkan og er gift hinum moldríka viðskiptamanni John Haynes.

Alyona er 25 ára gömul og kemur frá Úkraínu. Hún er einnig þekkt sem andlit fyrir vinsæla stefnumótasíðu sem kemur breskum karlmönnum í kynni við rússneskar konur.

Hinn 23 ára gamli Ronaldo er talinn hafa komist í kynni við Alyonu á Alderley Edge sem er vinsæll staður hjá leikmönnum Manchester United.

Blaðið birtir síðan mynd af parinu yfirgefa virtan veitingastað að nafni Piccolino um síðustu helgi.

Heimildarmaður blaðsins sem var að borða á staðnum sama kvöld segir að Alyona og Ronaldo hafi setið hlið við hlið og notið matarins ásamt öðru pari.

Eftir matinn hoppaði hersingin upp í Porche Cayenne jeppa Ronaldos og hvarf á brott.

Nokkrum dögum síðar snæddi Alyona málsverð ásamt eiginmanni sínum og ellefu ára gamalli dóttur hans, en eiginmaðurinn fagnaði þá 50 ára afmæli sínu. Sagt er að hann hafi verið að reyna að blása lífi í sambandið, sem ku vera í molum.