Ekki víst að Craig leiki Bond aftur

Breski leikarinn Daniel Craig útilokar ekki að nýjasta Bond-myndin og hans önnur, Quantum of Solance, geti verið hans síðasta í hlutverki njósnarans.

Þetta kemur fram í viðtali við hann í BANG Showbizz. Craig gerði á sínum tíma samning um að leika James Bond í fjórum kvikmyndum og er hálfnaður á þeim samningi. Hann segir að sér líði vel í hlutverki njósnara hennar hátignar en að samningurinn sé aðeins pappír. „Við skulum sjá hvernig þessi gengur," bætir hann við um Quantum of Solace.

„Í kvikmyndageiran ganga hlutirnir ekki alltaf upp. Við verðum að bíða og sjá. Gangi myndin ekki vel þurfum við að skoða málin upp á nýtt," segir Craig. Quantum of Solace verður frumsýnd hér á landi 7. nóvember.