Hark, fríar máltíðir og lítill peningur

Á morgun koma út þættirnir um Nonna og Manna sem sýndir voru í Sjónvarpinu við miklar vinsældir. Þættirnir eru sex talsins og með aðalhlutverk fara Garðar Thor Cortes, Einar Örn Einarsson og Jóhann G. Jóhannsson.

Vísir hafði samband við þann síðastnefnda og fékk hann til að rifja upp ævintýrið.

„Ég leik smalann Júlla sem er að mínu mati hetjan í þáttunum. Hann er í raun aðalkallinn. Þættirnir hefðu eiginlega átt að heita JÚLLI en vegna þess að sá sem skrifaði sögurnar hét Jón Sveinsson og er auðvitað Nonni þá var það ofan á," svarar Jóhann.

„Það var undarlegt og skemmtilegt þegar við vorum á Búðum á Snæfellsnesi og það var verið að taka upp senu þar sem Nonni og Manni gráta og minnast Júlla sem dó hetjulega," svarar Jóhann þegar talið berst að tökunum.

Rekinn inn á hótel

„Ég var á setti og var að „leikstýra" þeim. Hvísla að þeim að þeir ættu nú að gráta hærra og lék það fyrir þá og svo þegar tökur hófust þá sprungu þeir alltaf úr hlátri, því ég var bak við myndavél að gretta mig og gráta til að sýna þeim."

„Það endaði með því að ég var rekinn inn á hótel því það var enginn vinnufriður. Svo auðvitað sagan þegar við fengum að keyra bílaleigubílinn, ég fékk ælupest, strákarnir duttu í ána, Nonni fékk rafstuð á viðkvæman stað og svona. En það eru sögur fyrir minningabókina Nonni, Manni og Júlli," segir Jóhann.

Var þátttaka þín í Nonna og Manna ástæðan fyrir því að þú starfar sem leikari í dag?  „Já, meðal annars, ég ákvað það reyndar þegar ég var 6 ára. En sannfærðist þarna, byrjaði á toppnum. Hélt að þetta væri lífið, trailer, stórstjörnur, fríar máltíðir, aðdáendabréf og virðing við mig sem sæmdi prinsi. En svo komst ég að hinu sanna. Þetta er hark og lítill peningur."

„Hef í raun ekki toppað þetta ennþá, komst nærri því þegar ég var valinn að leika í Clint Eastwood myndinni Flags of Our Fathers með aðbúnað, stjörnur og fríar máltíðir en komst þá aldrei fyrir framan vél," segir Jóhann að lokum.