Segja Vegagerðina skulda 30-40 milljónir vegna Grímseyjarferju

Forsvarsmenn Vélsmiðju Orms og Víglundar segja Vegagerðina skulda sér 30-40 milljónir vegna aðkomu fyrirtækisins að breytingum á Grímseyjarferjunni, Sæfara. Ummæli um fyrirtækið í greinargerð Vegagerðarinnar vegna ferjunnar segja þeir rógburð og dylgjur. Þetta kom fram í fréttum Sjónvarps nú í kvöld.

Í greinargerðinni er farið hörðum orðum um Vélsmiðjuna sem sá um stærstan hluta af endurbótum á Grímseyjarferjunni Sæfara.

Þar er fyrirtækið sagt hafa haldið viðfangsefninu í gíslingu og að verktakann hafi virst skorta bæði vilja og getu til þess að vinna af þeim krafti að verkefninu sem verkáætlun og loforð um mönnun gerði ráð fyrir.

Í fréttum Sjónvarpsins kom fram að forsvarsmenn fyrirtækisins furði sig á þessari niðurstöðu sem er þvert á það sem lögfræðingar fyrirtækisins og Vegagerðarinnar hafi áður rætt.

Þeim sé hins vegar farið að lengja eftir 30-40 milljónum sem Vegagerðin skuldi þeim vegna verksins og íhugi að sækja eigur Vélsmiðjunnar um borð í ferjuna.