Ráðherrar vilja ekki að Brown víki

Ráðherrar bresku ríkisstjórnarinnar segja alrangt að þeir séu að skipuleggja atlögu gegn Gordon Brown forsætisráðherra, eins og bresku blöðin hafa haldið fram. Einn þeirra sem nefndur hefur verið sem hugsanlegur eftirmaður Browns segist engan áhuga hafa á starfinu.

Jack Straw dómsmálaráðherra, sem bresku blöðin segja fara fyrir hópi þingmanna og ráðherra sem vilji sparka Brown, kvaðst í morgun engin slík áform hafa.

Gordon Brown er besti maðurinn til að leiða okkur í gegnum þá erfiðleika sem við eigum nú í, sagði Straw í yfirlýsingu sem hann sendi BBC í morgun. Gordon hefur gert það áður og mun gera það aftur.

Vangaveltur um framtíð Browns hafa tekið flugið eftir að Verkamannaflokkurinn tapaði öruggu þingsæti sínu í Glasgow fyrir helgina. Sunnudagsblöðin bresku eru uppfull af fréttum af áhyggjufullum þingmönnum sem leggja hart að ráðherrum sínum að láta Brown fjúka.

Sjálfur segist Brown síst af öllu ætla sér að láta af embætti nú þegar öll veröldin stendur frammi fyrir kröppum efnahagsvanda.

Varaformaður flokksins, Harriet Harman, hefur tekið í sama streng og segir að flokkurinn einbeiti sér nú að því að veita þjóðinni forustu, en ekki samsæri gegn forsætisráðherranum. Það væru alvarlegt mistök að bregðast við alvarlegum efnahagsvanda með pólitískri kreppu.