Talíbanar að sigra í áróðursstríðinu

Talíbanar í Afghanistan eru að sigra Vesturlönd - í áróðursstríðinu. Svo segir virt rannsóknarstofnun sem einnig bendir á að Talíbanar nýti vandlega reiði almennings yfir of tíðum árásum sem leiði til dauða óbreyttra borgara.

Það er rannsóknarstofnunin International Crisis Group sem hefur komist að þessari niðurstöðu eftir ítarlegar athuganir. Þessi stofnun hefur starfað um langt árabil og nýtur mikillar virðingar víða um heim. Stofnunin ráðleggur afgönsku ríkisstjórninni að gera meira til að vekja athygli á hroðaverkum Talíbana og takast á sama tíma á við spillinguna sem einkennir stjórn Hamids Kharzai.

Í nýrri skýrslu um ástandið í Afghanistan segir Crisis Group að þótt Talíbanar ráði engu landi og hafi engin völd, þá hafi hreyfing þeirra haft lag á að virðast bæði stærri og sterkari en hún raunverulega sé.

Með úthugsaðri fjölmiðlastefnu, bæði heima og heiman, hafi Talíbönum tekist að spila á þjóðernisást margra Afghana og opinbera margskonar stefnuleysi Kabúl-stjórnarinnar og stuðningsmanna hennar erlendis.

Afleiðingin er sú, segir í skýrslu Crisis Group, að jafnvel þótt beinir stuðningsmenn Talíbana séu fáir, þá takist þeim að draga úr stuðningi við stjórnina. Sífellt dýpkandi gjá er á milli stjórnarinnar og almennings, segir í skýrslunni.

Í skýrslunni er fullyrt að Kabúl-stjórninni og stuðningsmönnum hennar, það er að segja NATO hernum, muni ekki takast að vinna hernaðarsigur á Talíbönum og því sé lífsnauðsynlegt að sigrast á hugmyndafræði þeirra og ímynd.

Til að gera það þurfa Kabúl-stjórnin og alþjóðasamfélagið að beina kastljósinu að grimmd Talíbana og takast af alvöru á við þau þjóðfélagsmein sem þeir noti sér til framdráttar.