Flóð valda usla víða um heim

Mestu flóð í hundrað ár hafa kostað 17 manns lífið í Úkraínu, Moldóvu og Rúmeníu og valdið gríðarlegum skemmdum á ökrum og beitilandi. Jafnframt eru flóð í suður- og vestur Þýskalandi að gera mönnum lífið leitt.

Áframhaldandi rigningum er spáð í vesturhluta Úkraínu næstu daga. Þar hefur rignt látlaust í nærri viku með þeim afleiðingum að meira en 20 þúsund heimili hafa farið undir vatn og rúmlega sjö þúsund manns bjargað, flestum með bátum og þyrlum.

Vatnsborð ánna Prut og Dnéstr eru enn hættulega há og er hætt við að fleiri götur og vegir skemmist dragi ekki úr regninu. Allt að þrír fjórðu væntanlegrar uppskeru á flóðasvæðunum í Úkraínu hafa eyðilagst, sem verður til að auka á vanda bænda á svæðunum, sem hafa það ekkert of gott fyrir.

Í Rómaníu hafa níu þúsund manns úr tvö hundruð þorpum verið flutt að heiman. Þar hafa tvö þúsund heimili skemmst eða eyðilagst í vatnsflaumnum og að minnsta kosti 19 þúsund hektarar ræktarlands eru undir vatni. Vatnið í Rómaníu kemur mest frá Úkraínu en árin Prut er þar á landamærunum.

Þrjú þúsund lögreglu- og hermenn hafa verið kallaðir út til að verja byggð fyrir enn meira vatni sem búist var við frá Úkraínu síðar í dag.

Í Þýskalandi voru mikil flóð umhverfis borgina Dortmund í vesturhluta landsins. Þar hefur flætt inn í kjallara og bílar farið á kaf í vatni. Vegum hefur verið lokað. Flóð eru einnig á afmörkuðum svæðum á milli Dusseldorf og Aachen.

Og það er víðar sem veður er óvenjulegt. Í úthverfum Sydney í Ástralíu féll snjór í nótt - í fyrsta sinn í rúmlega 170 ár.