Lavrov: Bandaríkjamenn velji milli Rússa og Georgíumanna

Vaxandi kulda gætir í samskiptum Rússa og Bandaríkjamanna vegna deilu þeirra fyrrnefndu við Georgíumenn.

Sergei Lavrov, utanríkisráðherra Rússlands, sagði í dag að Bandaríkin þyrftu að ákveða hvort þau vildu eiga góð samskipti við Rússa eða Georgíumenn. Hvort tveggja væri ekki hægt. Þessi orð féllu eftir að George Bush Bandaríkjaforseti tilkynnti að Bandaríkjamenn myndu veita Georgíumönnum neyðaraðstoð vegna átaka síðustu daga tengdum Suður-Ossetíu.

Condoleezza Rice, utanríkisráðherra Bandaríkjanna, er nú á leið til Georgíu. Hún svaraði Lavrov starfsbróður sínum og varaði Rússa við að brjóta vopnahléssamkomulagið sem gert var í gær. Rússland myndi einangrast verulega ef það gerðist.