Ríkisnefnd um mannasiði fyrir Ólympíuleikana

Kínverjum hefur verið gert að taka sig á í mannasiðum fyrir Ólympíuleikana - svo sem að hætta að hrækja um allar götur og smjatta. Sérstök ríkisnefnd hefur verið sett á laggirnar til að tryggja framfarir í mannasiðum - nefnd til uppbyggingar andlegrar siðmenningar, eins og hún heitir.

Daglegir siðir Kínverja hafa oft komið útlendingum spánskt fyrir sjónir - en nú herma fréttir að ástandið sé mikið að batna, þökk sé átakinu til andlegrar siðmenningar. Áberandi færri spýta á göturnar og biðraðir eru ekki lengur sjálfsagður vettvangur olnbogapústra og ýtinga. Því má þakka skipulögðum biðraðaæfingum 11. dag hvers mánaðar að undaförnu.

Borgarbúum í Beijing hefur einnig verið uppálagt að sýna útlendingum kurteisi og draga aðeins úr náttúrulegri forvitni sinni um einkahagi fólks.

Skólabörn hafa fengið tilsögn í góðum siðum - þau hafa æft söngva um góða siði og lært að hirða rusl upp af götum og koma því til endurvinnslu samkvæmt reglugerðum. Borgarbúar hafa verið hvattir til að vera ekki í of litskrúðugum fötum - og að steinhætta að ganga um á náttfötunum, sem er algeng sjón í kínverskum borgum. Rúmlega milljón sjálfboðaliðar hafa verið virkjaðir til að kenna góða mannasiði í skólum, háskólum og á opinberum skrifstofum.

Og á Ólympíuleikunum á að klappa jafnt fyrir öllum - enda sé sigur eða tap í keppni tímabundið bakslag en menningarásýnd ríkisins lifi um alla eilífð.