Áskrifendur tölvuleiksins EVE fleiri en Íslendingar í árslok?

Nú stendur yfir uppfærsla á hinum íslenska tölvuleikjarheimi EVE-Online sem kallast Empyrean Age sem myndi útleggjast á íslensku sem Öld eldhiminsins. Gengur þessi nýja útfærsla út á að stríð er hafið í heiminum á milli hinna fjöggurra kynþátta sem leikmenn geta valið sér að tilheyra. CCP, fyrirtækið sem heldur úti leiknum, gerir ráð fyrir að þessi uppfærsla eigi eftir að fjölga áskrifendum til muna og vonast til þess að ná fjölda íslensku þjóðarinnar í árslok.

Fjöldi áskrifenda nú í leiknum er tæplega 240.000 en svo eru aðrir 50-60.000 með prufuáskrift samkvæmt Magnúsi Bergssyni hjá CCP. Áskrifendafjöldi hefur vaxið ört, í fyrra var hann 154 þúsund þannig að ágætis líkur ættu að vera á því að áskrifendafjöldi nái íbúafjölda Íslands bráðlega.

Hingað til hefur verið fremur erfitt fyrir nýja leikmenn að komast fljótlega í bardaga þannig að mögulegt er að nýja uppfærslan vekji áhuga hjá þeim leikmönnum sem vilja komast í hasar sem fyrst í leiknum.

EVEheimurinn gengur í grófum dráttum út á það að á vissu svæði í geimnum búa fjórir kynþættir sem hingað til hafa lifað í sátt. Á þessu svæði spila flestir leikmenn en í kringum þetta svæði er svo svæði í geimnum þar sem lög og reglur gilda ekki heldur mynda leikmenn bandalög sem eru í sífelldum smástríðum.

Ef leikmenn kjósa geta þeir gengið í her þess kynþátt sem leikmaður tilheyrir samkvæmt Magnúsi. Vilji hann halda áfram í friði og ró í leiknum þarf hann þó ekki að taka þátt í stríðinu og ætti ekki að verða fyrir neinum missi vegna stríðsins. "Það verður áhugavert að fylgjast með því hvaða afleiðingar stríðið mun hafa en EVE-Online gefur notendum mikið frelsi á því hvernig þeir spila og því ómögulegt að spá fyrir um niðurstöðu stríðsins" segir Magnús að lokum.