Packardinn kominn á götuna

Vegfarendur um Álftanesveg ráku upp stór augu í dag þegar mættu virðulegri Packard bifreið á númerum forsetaembættisins. Um er að ræða fyrsta forsetabíl þjóðarinnar, 1942 módel og hefur bíllinn verið í yfirhalningu hjá Sævari Pétussyni bifvélavirkja frá árinu 1998.

Sævar og embætti forsetans hafa staðið í deilum vegna bílsins síðustu misseri en embættið neitaði að greiða Sævari uppsettan kostnað vegna viðgerðarinnar. Var því haldið fram að Sævar hefði farið fram úr þeim heimildum sem veittar voru til verksins á sínum tíma.

Sævar hafði hótað að selja bílinn á uppboði féllist embættið ekki á kröfu hans. Í frétt RÚV um málið í júlí á síðasta ári kemur fram að uppboðinu hafi verið frestað á meðan unnið væri að sáttum í málinu.

Heimildir Vísis herma að nú hafi þær sættir náðst og að stutt sé í að forsetinn sýni nýja bílinn við hátíðlega athöfn. Sævar Pétursson bifvélavirki vísaði á Örnólf Thorsson forsetaritara þegar Vísir spurði hann út í bíltúrinn sem farinn var í dag. Örnólfur vildi hins vegar ekki tjá sig um málið.