Sprengjuefni stolið í Frakklandi

Franskir sérsveitarmenn leita nú að 28 kílóum af sprengiefnum sem hurfu úr öryggisgeymslu við Corbas, nærri borginni Lyon. Breska Ríkisútvarpið, BBC, hefur eftir frönsku lögreglunni að um sé að ræða Semtex, öflugt plastsprengiefni, sem erfitt sé að greina.

Innanríkisráðherra Frakka staðfestir að verið sé að leita að efninu og lögreglan segir að þjófnaðurinn sé litinn mjög alvarlegum augum. Lögreglan leitar einnig kveikiþráða sem hurfu, eftir því sem AFP fréttastofan fullyrðir.

Hvarfs sprengiefnanna varð fyrst vart í dag en talið er að þau gætu hafa horfið fyrir viku síðan. Innanríkisráðuneyti Frakka segir að sprengiefnin séu notuð til þess að gera gömul stríðsvopn óvirk. Brestir í öryggiskerfi hafi valdið því að þeim hafi verið stolið.