Þróunarkenning Darwins samræmist biblíunni segir Vatíkanið

Vatíkanið hefur látið þau boð út ganga að þróunarkenning Darwins samræmist biblíunni ágætlega en hyggst þó ekki senda honum afsökunarbeiðni eins og Enska kirkjan.

Reyndar er þetta ekki í fyrsta skiptið sem Vatíkanið segist sætta sig við kenningu Charles Darwin um svokallað náttúruval og að þeir hæfustu lifi af, Píus páfi XII. sagði árið 1950 að hún væri svo sem alveg ásættanleg vísindaskýring á tilvist mannsins og Jóhannes páfi tók undir það árið 1996.

Menningarmálaráðherra Vatíkansins, Gianfranco Ravasi, tilkynnti í gær, um leið og hann kynnti vísindaþing sem haldið verður í Róm á 150 ára afmæli þróunarkenningar Darwins, að þrátt fyrir að Vatíkanið gæti fallist á að Darwin hefði haft rétt fyrir sér væri það þó engan veginn ætlun þess að biðja hann afsökunar eins og Enska kirkjan gerði í síðustu viku.