Semja frið við berrassaða Þjóðverja

Þýskir og pólskir sóldýrkendur hafa samið um vopnahlé eftir harðvítugar deilur um Usedom strönd á mörkum landanna. Þýska hliðin er nektarströnd, og fannst gestum hennar Pólverjarnir glápa full mikið á sig þar sem þeir viðruðu það allra heilagasta.

„Manni líður eins og apa í dýragarðinum. Pólverjarnir mæta með sjónauka, glápa á okkur og blóta," sagði strípalingurinn Ines Muller við fjölmiðla.

Þjóðverjarnir höfðu verið á ystu nöf síðan grindverk á landamærunum var rifið niður og Pólverjar öðluðust fullkomið útsýni yfir þýska hluta strandarinnar. Sættir hafa nú náðst, og verða skilti á báðum tungumálum sett upp á ströndinni sem afmarka klædda hlutann frá hinum nakta. Þá verða sett upp skilti aukalega Þýskalandsmegin til að minna Þjóðverjana á að Pólverjar vilja hafa ströndina sína án berrassaðra sóldýrkenda.