Viðskipta- og hagfræðingar með yfir hálfa milljón í mánaðarlaun

Viðskipta- og hagfræðingar eru að meðaltali með 540 þúsund krónur í heildarlaun samkvæmt kjarakönnun sem Capacent Gallup gerði fyrir Félag viðskipta- og hagfræðinga.

Könnunin var birt í morgun en hún byggist á svörum nærri tvö þúsund viðskipta- og hagfræðinga. Meðalheildarlaunin hafa hækkað um fjögur prósent frá því í fyrra en til samanburðar höfðu launin hækkað áður um 13 prósent á tveggja ára tímabili eða um 6,5 prósent á ári.

Þegar niðurstöðurnar eru greindar eftir starfsaldri svarenda kemur í ljós að laun þeirra sem eru með minnstan starfsaldur hækka hlutfallslega meira en þeirra sem hafa starfað lengur sem viðskipta- eða hagfræðingar. Þá sýnir könnunin að laun kvenna hafi hækkað hlutfallslega meira en laun karla. Mánaðarlaun kvenna hækka um ríflega 11 prósent og er miðgildi þeirra nú 500 þúsund krónur en laun karla hækka um 2,4 prósent og eru nú 600 þúsund krónur á mánuði. Þegar ekki er tekið tillit til annarra þátta mælast því karlar með fimmtungi hærri laun en konur.

„Vinnuvika karla er að meðaltali 51,6 klukkustundir en kvenna að meðaltali 47,5 stundir. Þegar launamunurinn er leiðréttur með tilliti til vinnuframlags mælist munurinn nú 15,6% en var um 21% í Kjarakönnunum FVH árin 2007 og 2005. Þegar launamunur kynjanna er svo leiðréttur með tilliti til fleiri þátta eins og menntunar, starfs, atvinnugreinar, aldurs, vinnuframlags, mannaforráða og starfsaldurs kemur í ljós að launamunur kynjanna virðist vera heldur að minnka. Nú mælist leiðréttur launamunur 7,5% en var 8,8% árið 2007, 7,6% árið 2005 og 6,8% árið 2003," segir í tilkynningu Félags viðskipta- og hagfræðinga.