Grundvallarreglur um mannréttindi þverbrotnar

Jón Ásgeir Jóhannesson og þeir sem Ríkislögreglustjóri hefur ákært fyrir meint skattalagabrot hafa sent frá sér tilkynningu í kjölfar ákærunnar. Þar segir að hér sé enn á ferðinni gamla „Baugsmálið" sem hófst með húsleit ríkislögreglustjóra hjá Baugi í ágúst 2002.

„Ákærandinn í þetta sinn er sami maðurinn og stýrði húsleitinni. Þetta er í þriðja sinn sem gefin er út ákæra í þessu sama máli. Það er gert þrátt fyrir að Hæstiréttur hafi í dómi fundið berum orðum að því við ákæruvaldið að sá tími sem leið frá upphafi rannsóknarinnar í ágúst 2002 og þar til ákæra númer tvö var gefin út í mars 2006 hafi verið allt of langur," segir í tilkynningunni.

Þá segir ennfremur að svo virðist sem ákæruvaldið taki ekki mark á slíkum aðfinnslum æðsta dómstóls landsins en velji að ákæra rétt einu sinni í málinu þótt nú sé komið á sjöunda ár frá því rannsókn málsins hófst.

„Þetta er gert þótt Héraðsdómur Reykjavíkur hafi í gær vísað frá dómi ákæru frá þessum sama ákæranda vegna annmarka á málsmeðferð sem enn frekar eiga við um nýjustu ákæruna," segir í tilkynningunni en þar er átt við meint skattalagabrot Jóns Ólafssonar sem vísað var frá dómi í gær.

„Ákæran er gegn Baugi, Gaumi, Jóni Ásgeiri Jóhannessyni, Kristínu Jóhannesdóttur og Tryggva Jónssyni. Þessir einstaklingar hafa mátt eyða drjúgum hluta síðustu sjö ára til þess að verja hendur sínar hjá ríkislögreglustjóra og fyrir íslenskum dómstólum."

Í tilkynningunni segir einnig að persónuleg skattamál ákærðu sem og skattamál Baugs og Gaums sem ákært sé fyrir hafi hlotið endanlega niðurstöðu hjá skattayfirvöldum. Þess megi einnig geta að eftir niðurstöðu yfirskattanefndar í máli Jóns Ásgeirs, Tryggva og Gaums hafi þessir aðilar fengið tugi milljóna króna endurgreidda frá ríkissjóði.

„Ákærðu telja að með ákærunni séu þverbrotnar á þeim grundvallarreglur um mannréttindi með því að ákæra margsinnis í sama máli og draga mál svo lengi að óafsakanlegt sé."