Fær langþráða hvíld í janúar

Páll Óskar er uppteknasti maður landsins. Hann keyrir sig út nú fyrir jólin en tekur langþráð frí eftir áramót. „Síðasti mánuður er búinn að vera eins og „groundhog-day" hjá mér. En ég næ þessu með því að borða hollan mat og fara í ræktina þegar ég get," segir Páll Óskar. Hann er nú á bullandi vertíð og þarf að selja að minnsta kosti tíu þúsund eintök af Silfursafninu sínu til að ná upp í kostnað.

„Þegar ég gerði kostnaðaráætlun í sumar - mjög heilbrigða áætlun - stóð evran í 80 krónum. Þá kostaði 2,8 milljónir íslenskar að búa til 10.000 eintök af settinu. Í nóvember þegar ég leysti út plöturnar var evran komin í 180 krónur og heildarupphæðin orðin 5,8 milljónir. Þar að auki þurfti ég að borga þetta á borðið því fyrirtækið í Austurríki sem hefur verið í viðskiptum áratugum saman við Íslendinga treysti ekki íslenskum aðilum lengur. Takk, Davíð Oddsson og seðlabankastjórn, takk, ríkisstjórn, takk, útrásarvíkingar og takk, Fjármálaeftirlit!"

Þótt Palli sé hundfúll með hina handónýtu krónu, er hann bjartsýnn á að ná upp í kostnað. Búið er að dreifa 14.000 eintökum og Palli hefur látið framleiða annað upplag af plötunni. Að vanda er hann duglegasti maðurinn í bransanum og þeytist út um allt.

„Monika vinkona mín sér um bókhaldið og dreifinguna og ef það koma stórar pantanir ber ég kassana inn með henni. Ég er að klára hringferð um landið og ætla að enda hana á sama stað og hún hófst, núna á laugardaginn 20. desember á Nasa. Ég og Monika höfum spilað jólaprógrammið mikið á virkum dögum og svo er alltaf diskó um helgar. Það eru áritanir nánast á hverjum degi. Í hvert skipti árita ég svona 100 diska og 500 ókeypis plaköt. Þetta eru engar ýkjur!"

Palli sér fram á verðskuldað frí eftir jólatörnina. „Ég ætla að sofa í janúar. Skelli mér til LA í fyrsta skipti á ævinni og fæ að vera þar í íbúð sem vinur minn á. Ég sé fram á að liggja bara rotaður í mánuð."

drgunni@frettabladid.is