Niðurskurður leggst þungt á Háskólann á Akureyri

Útgjöld til Háskólans á Akureyri verða skorin niður um 127,5 milljónir króna eða 8,8% samkvæmt nýju fjárlagafrumvarpi ríkisstjórnar verði það samþykkt.

Háskólaráð skólans samþykkti á fundi sínum í vikunni að fela framkvæmdastjórn háskólans að gera tillögur að rekstraráætlun fyrir árið 2009 þar sem stefnt verði að því að mæta fyrirhuguðum niðurskurði án þess að segja upp starfsfólki. Fyrirsjáanlegt er að þessi niðurskurður mun leggjast þungt á starfsemi háskólans á næsta ári.

Kristín Ingólfsdóttir, rektor Háskóla Íslands, gagnrýndi boðaðan niðurskurð í samtali við Vísi í gær og sagði HÍ vera í afar þröngri stöðu. Ekki sé hægt að skera niður á sama tíma og nemendum fjölgar umtalsvert.

Umsóknarfrestur í Háskólann á Akureyri rann út á mánudaginn en þá höfðu 134 sótt um grunnnám við skólann og 30 í framhaldsnám. Fjöldi umsókna er tæplega 12% af nemendafjölda skólans.

,,Þrátt fyrir þennan niðurskurð verða þeir umsækjendur sem uppfylla inntökuskilyrði innritaðir í háskólann enda ganga þeir inn í námshópa sem þegar hefur verið gert ráð fyrir. Kappkostað verður að kennsla uppfylli ströngustu gæðakröfur hér eftir sem hingað til," segir í tilkynningu.