Fagnar komu Jónínu í Framsóknarflokkinn

Valgerður Sverrisdóttir formaður Framsóknarflokksins segist fagna komu íþróttafræðingsins Jónínu Benediktsdóttur í flokkinn. Hún segir gott að vita af því að Jónína hafi trú á Framsóknarflokknum.

Líkt og DV greindi frá í morgun er Jónína nú gengin til liðs við Framsóknarflokkinn. „Það er öllum frjálst að skrá sig í flokkinn og við hljótum að fagna nýjum einstaklingum," segir Valgerður aðspurð um nýjasta liðsmann flokksins.

Jónína hefur verið áberandi í þjóðfélagsumræðunni undanfarið og því er innkoma hennar líklega mikill fengur fyrir flokkinn.

En heldur Valgerður að Jónína muni reyna fyrir sér í prófkjöri? „Ég þekki það nú ekki en ég tók eftir því þegar hún sagði sig úr sjálfstæðisflokknum fyrir nokkrum vikum. Hún er greinilega áhugasöm um stjórnmál og vill vera liðsmaður í flokki. Hún hefur nú valið Framsóknarflokkinn og það er ágætt að vita af því að hún hefur trú á þeim flokki."