Enn varað við nígerískum fjársvikum

Lögreglan á höfuðborgarsvæðinu varar við fjársvikum með erlendum tékkum. Í tilkynningu frá lögreglunni segir að svikin fari þannig fram að viðskiptum sé komið á í gegnum íslenska sölusíðu.

Kaupandinn sendir síðan sem greiðslu falsaðan erlendan tékka í pósti þar sem tékkafjárhæðin er mun hærri en söluverð hlutarins. Óskað er eftir því að mismunurinn verði sendur til baka seljandanum í formi peningasendingar með milligöngu Western Union til þess lands þar sem kaupandinn kveðst vera staddur.

Seljandinn, grunlaus um að tékkinn sé falsaður, skiptir honum í banka. Þegar tékkanum er síðan hafnað af hinum erlenda reikningsbanka er hins vegar búið að innleysa peningasendinguna. Seljandinn situr þá eftir með sárt ennið og þarf að öllum líkindum að endurgreiða íslenska innlausnarbankanum andvirði tékkans.

Við rakningar á IP-tölum sést að þeir sem standa að baki þessu eru staddir í Nígeríu þótt peningasendingarnar fari annað.