Skráðum háskólanemum fjölgar um 70 prósent á sjö árum

Skráðum nemendum á háskólastigi á Íslandi hefur fjölgað um nærri 70 prósent frá árinu 2000 samkvæmt tölum Hagstofu Íslands.

Á vef stofnunarinnar kemur fram að ríflega 17.700 manns hafi verið skráðir í háskóla landsins í haust og samtals eru rúmlega 46 þúsund manns skráðir í framhaldsskóla og háskóla í landinu. Það eru fleiri en nokkru sinni fyrr. Hefur skráðum nemendum á framhaldsskólastigi hefur fjölgað um rúm 42 prósent frá árinu 2007.

Af þessum 46 þúsund nemendum framhalds- og háskólum eru fjórir fimmtu skráðir í dagskóla, 15 prósent í fjarnám og rúm fjögur prósent í kvöldskóla. Kvöldskólanám hefur verið á undanhaldi allt frá 2003 en það haust voru rúm átta prósent nemenda skráðir í kvöldskólanám. Nemendum í fjarnámi fjölgar hins vegar umtalsvert á sama tíma eða um 3.085, sem er nærri 78 prósenta aukning á tímabilinu.

Tölur Hagstofunnar leiða einnig í ljós að rúmlega 1300 grunnskólanemendur voru skráðir til náms í framhaldsskólum landsins síðastliðið haust, 620 piltar og 716 stúlkur. Grunnskólanemendur eru tæp fimm prósent af skráðum nemendum í framhaldsskólum. Að auki taka sumir grunnskólanemendur framhaldsskólaáfanga í grunnskólum og koma ekki fram í þessum tölum.

Konur fleiri í öllum deildum HÍ nema einni

Þegar litið er til kynjahlutfalla eru konur eru umtalsvert fleiri en karlar meðal nemenda í framhaldsskólum og háskólum. Alls stunda rúmlega 26.300 konur nám á móti ræplega 19.800 körlum. Konur eru því 57,1 prósent nemenda á þessum tveimur skólastigum en hlutur karla er 42,9 prósent. Þegar skipting nemenda eftir kyni er skoðuð í Háskóla Íslands má sjá að konur eru meirihluti nemenda í öllum deildum nema verkfræðideild.