Guantanamo réttarhöld mögulega dæmd ómerk

Fyrstu réttarhöldin í sérstökum bandarískum hérdómsstól í Guantanamo-fangabúðunum gætu verið dæmd ómerk vegna óskýrleika á skilgreiningu á því hvað sé glæpur og hvað sé stríðsglæpur.

Eru réttarhöldin yfir fyrrum bílstjóra Osama bin Laden, Salim Hamdan sem er sakaður um að hafa unnið að hryðjuverkum með samtökunum. Talið er að réttarhöldin yfir Hamdan muni gefa til kynna hvort þessi dómstóll eigi eftir að halda lífi en hann hefur sætt mikilli gagnrýni á alþjóðavísu.

Bandaríkin skilgreina Hamdan og hina 265 Guantanamo-fangana sem „ólöglega óvinahermenn" því þeir starfi ekki fyrir þjóðher. Hamdan er sakaður um að hafa flutt tvö flugskeyti sem notuð voru gegn Bandaríkjaher og öðrum herum í Afganistan. Til þess að geta sakað hann um stríðsglæp þarf að sanna að flugskeytin hafi verið notuð gegn óbreyttum borgurum samkvæmt skilgreiningu á stríðsglæp.

Saksóknarar telja að flugskeytunum hafi ekki verið beitt gegn óbreyttum borgurum. Þeir vilja hins vegar breyta skilgreiningunni á stríðsglæp þannig að hver tilraun til þess að drepa Bandaríkjahermann í bardaga af „ólöglegum óvinahermanni" sé stríðsglæpur. Ef saksóknarar halda þeim mótmælum til streitu gætu réttarhöldin verið talin ómerk.