Hundruð votta Solzhenitsyn virðingu sína

Hundruð manna hafa í morgun vottað Alexander Solzhenitsyn virðingu sína en lík hans liggur nú á viðhafnarbörum í sal rússnesku vísindaakademíunnar.

Hermenn standa viðhafnarvörð við börur Solzhenitsyns sem var allt í senn, rithöfundur, andófsmaður og föðurlandsvinur. Syrgjendur leggja blóm að kistunni. Eiginkona rithöfundarins, Natalia, tók á móti fólki ásamt tveimur sonum þeirra hjóna.

Solzhenitsyn, sem lést á sunnudagskvöldið, verður grafinn í garði Donskoi-munkaklaustursins í Moskvu á morgun.

Þeir Rússar sem nú minnast og syrgja Solzhenitsyn eru fyrst og fremst þeir sem muna eftir honum sem ósigrandi baráttumanni gegn ofríki Sovéttímans. Eftir að hann sneri aftur heim úr útlegð 1994 áttu tæpitungulausar umvandanir hans hins vegar ekki upp á pallborðið hjá þjóðinni sem vildi helst gleyma fortíðinni.

Sjónvarpsþáttur sem hann stýrði var fljótlega tekinn af dagskrá enda áhorfendur fáir. Undir það síðasta höfðu frjálslyndisöflin í Rússlandi gefið hann upp á bátinn, ekki síst vegna stuðnings Solzhenitsyns við Pútín þáverandi forseta sem menn saka um að hafa sett bremsurnar á pólitískar umbætur í landinu.