Pierce Brosnan er að farast úr áhyggjum yfir björgunarhringnum

James Bond stjarnan fyrrverandi Pierce hefur miklar áhyggjur af þyngdinni þessa dagana. Leikarinn lék síðast í söngleiknum Mamma Mia og segist spikfeitur í þeirri mynd. Honum bráðliggur nú á að losna við aukakílóin áður en að hann tekur að sér aðalhlutverkið í mynd Pauls Verhoeven, The Thomas Crown Affair 2.

Pierce segir leikstjórann gera kynþokkafullar myndir og því sé honum hollast að drífa sig í gymmið. Leikarinn tekur aftur að sér hlutverk þjófsins í myndinni, sem er sjálfstætt framhald hinnar geysivinsælu Thomas Crown Affair sem kom út árið 1999. Angelina Jolie er sögð í lokaviðræðum um að taka að sér aðal kvenhlutverkið í myndinni, en það lék Rene Russo í þeirri fyrri. Leikarinn sagði mikilvægt að persóna hans fengi að spreyta sig á því að heilla nýja konu í myndinni.