SVÞ vill að seljendur fá debetkortagreiðslur samdægurs

Samtök verslunar og þjónustu hafa sent Seðlabankanum bréf og óskað eftir því að bankinn hlutist til um að andvirði vara og þjónustu, sem greitt er fyrir með debetkortum, færist inn á reikning seljanda á söludegi.

 

Í fréttabréfi Samtaka verslunar og þjónustu er bent á að samtökin hafi í nokkur ár barist fyrir þessu enda sé eðlilegt að seljandi fá greitt fyrir vöru eða þjónustu á sama degi og vara eða þjónusta er innt af hendi.

 

Benda samtökin á að bankar og sparisjóðir séu lokaðir um þriðjung ársins, eða í 117 daga ári. Debetkortafærslur sem berist frá söluaðilum fyrir klukkan 22 á kvöldin bókist inn á reikning seljanda og séu til ráðstöfunar daginn eftir. Ef færslur berist eftir 22 séu þær hins vegar til ráðstöfunar þarnæsta virka dag. Þetta þýði að debetkort virki ekki sem staðgreiðslukort um helgar og á öðrum frídögum þegar bankar og sparisjóðir eru lokaðir.

 

,,Skuldavextir reiknast þó á skuldara þessara fyrirtækja þrátt fyrir umrædda lokun. Því er erfitt að horfa upp á að innlegg þeirra vegna sölu, sem greidd er með debetkortum og gæti lækkað skuldir, liggja óafgreidd og vaxtalaus hjá fjármálastofnunum þriðjung ársins," segja Samtök verslunar og þjónustu. Þau segja Seðlabankann gegna lykilhlutverki í að breyta þessu og því hafi honum verið sent bréf.