Tungumál friðar í viðræðum um sameinað Kýpur

Leiðtogar Grikkja og Tyrkja á Kýpur reyna nú að semja um endursameiningu eyjarinnar, sem hefur verið tvískipt í rúma þrjá áratugi.

Dimitris Christofias, forseti KýpurÖ-Grikkja, og Mehmet Ali Talat, forseti Kýpur-Tyrkja ræða saman í flugstöð á hlutlausasvæðinu þar sem friðargæsluliðar Sameinuðu þjóðanna ráða ríkjum.

Kýpur var skipt í tvö yfirráðasvæði eftir innrás tyrkneska hersins árið 1974 í kjölfar tilraunar til hallarbyltingar sem hafði það markmið að sameina Kýpur Grikklandi. Blóðsúthellingarnar sem byltingunni og innrásinni fylgdu valda enn kraumandi andúð milli Grikkja og Tyrkja á eyjunni.

En þeir eru líka margir sem vilja líta fram á við og sjaldan hefur ríkt jafn mikil bjartsýni um að hægt verði að semja um sameiningu Kýpur. Á fundinum í dag ætluðu Christofias og Talat að ræða fyrirkomulag á stjórnarháttum í framtíðinni. Að auki þarf að ná samkomulagi um það hvort þeir sem þurftu að flýja heimili sín fyrir 34 árum eigi að fá að fara heim aftur eða fá bætur fyrir það sem þeir misstu.

Við komuna á fundinn í dag talaði kýpur-tyrkneski forsetinn tyrknesku, grísku og ensku við fréttamenn. Þegar kýpur-gríski forsetinn var spurður hvaða tungumál yrði notað á fundinum svaraði hann, tungumál friðar.