Björgunarafrek á Selfossi

Það var laust fyrir klukkan ellefu í gærkvöldi sem lögreglu barst tilkynning um bílinn. Ökumaðurinn var þá með meðvitund og gat veifað í land þegar björgunarlið kom á vettvang. Vatnshæðin í ánni var þá um hálfum metra hærri en hún var í dag og ís var einnig mun meiri. Vel gekk að ná ökumanni út og um borð í björgunarbátinn en þegar átti að sigla með hann í land drapst á vél bátsins, að því er talið er vegna þess að ís komst í mótorinn. Hægt dró af manninum og hætti hann að anda samtímis því sem bátinn rak niður Ölfusá. Björgunarmönnum tókst hins vegar að blása lífi í hann og hnoða og náðu þeir landi við ketta neðan Selfosskirkju. Ökumaðurinn, nítján ára piltur úr Reykjavík, var fluttur á sjúkrahús til Reykjavíkur og er á batavegi. Oddur Árnason aðstoðaryfirlögregluþjónn segir að björgunarsveitarmenn hafi sett sig í mikla hættu og þeir eigi heiður skilið fyrir sín verk. Í dag hafði sjatnað það mikið í ánni að björgunarsveitarmenn gátu gengið út að bílnum frá landi og komið böndum í hann. Gekk síðan fljótt og vel að hífa hann í land á ný. Þessi atburður vekur hins vegar enn og aftur spurningar um öryggi vegfarenda og telur sýslumaðurinn á Selfossi, Ólafur Helgi Kjartansson, að fátt annað sé unnt að gera en að girða ána af með vegriði. Svona atburðir gerist við óvæntar aðstæður eins og hálku, eins og í gærkvöldi, og því megi búast við að þetta gerist aftur.